Smena ochish va yopish

Smena — bitta kassaning ish vaqti: ochilgandan yopilgunicha qancha sotilgani, qancha naqd kelgani va kassada qancha pul bo‘lishi kerakligi. Kassada savdo faqat ochiq smenada qilinadi. Smena yopilganda ONE POS kassada bo‘lishi kerak bo‘lgan naqdni sanalgan pul bilan solishtiradi va farqni ko‘rsatadi.

Smenani “Smena ochish va yopish” huquqi bor xodim (odatda kassir yoki menejer) ochadi va yopadi.

Smenani ochish

1. Kassaga PIN kodingiz bilan kiring.
2. Smena ochiq bo‘lmasa, “Smenani ochish” oynasi chiqadi.
3. Kassadagi naqd pulni sanang va “Kassadagi naqd, so‘m” ga yozing. Kassa bo‘sh bo‘lsa — 0.
4. “Smenani ochish” ni bosing. Savdo oynasi ochiladi, yuqorida “smena ochiq” deb yoziladi.

Bitta kassada bir vaqtda bitta smena ochiq bo‘ladi. Kassir almashganda smenani yopish shart emas — keyingi kassir o‘z PIN kodi bilan kirib, shu smenada sotishda davom etadi.

Kun davomida: smena hisoboti

Yuqoridagi “Smena” tugmasini bosing. Oynada:

• Ochilgan — qachon va kim ochgan;
• Buyurtmalar — nechta buyurtma, nechtasi bekor qilingan, nechtasi to‘lanmagan;
• Savdo va to‘lov turlari bo‘yicha: naqd, karta, Click va boshqalar;
• Chegirmalar, Ochilishdagi naqd;
• Kiritildi / olindi — kassaga qo‘yilgan va kassadan olingan pul;
• Kassadan xarajat, Naqd qaytarildi;
• Kassada bo‘lishi kerak — faqat huquqi bor xodimga ko‘rinadi (pastga qarang).

Kassada bo‘lishi kerak bo‘lgan naqd shunday hisoblanadi:

ochilishdagi naqd + naqd to‘lovlar + kiritilgan pul − olingan pul − naqd qaytarilgan pul − kassadan xarajat

Kassadan pul olsangiz yoki xarajat qilsangiz, uni darhol “Boshqa amallar” (⋯) → “Kassa harakati” yoki “Xarajat” orqali yozing. Shunda smena oxirida farq chiqmaydi.

Smenani yopish

1. “Smena” → “Smenani yopish” ni bosing.
2. Kassadagi naqd pulni sanang va aniq summani “Sanalgan naqd, so‘m” ga yozing.
3. Kerak bo‘lsa, “Izoh (ixtiyoriy)” ga yozing (masalan, “egaga 200 000 berildi”).
4. “Smenani yopish” ni bosing.

“Smena yopildi” oynasida yakuniy hisobot chiqadi. Huquqi bor xodim bu yerda “Farq” ni ham ko‘radi: manfiy — kassada pul kam, musbat — ortiqcha.

Kassir farqni ko‘rmasligi uchun

Kassir kassada qancha pul bo‘lishi kerakligini bilmasa, pulni halol sanaydi. Buning uchun ega kassir rolida “Yopishda kutilgan summani ko‘rish” huquqini o‘chirib qo‘yadi (“Sozlamalar” → “Kim nima qila oladi”). Shunda kassir faqat sanalgan summani kiritadi, oynada “Farqni ega yoki menejer ko‘radi.” deb yoziladi.

Ega va menejer barcha smenalarni panelda “Hisobot” bo‘limidagi “Smenalar” jadvalida ko‘radi: kim ishlagan, qancha sotgan va “Kassa farqi”.

Bo‘lmasa nima qilish kerak

• “Smena ochilmagan. Savdo uchun kassir yoki menejer smenani ochishi kerak.” Sizda smena ochish huquqi yo‘q. Huquqi bor xodim kirib, smenani ochsin — keyin siz sotishingiz mumkin.
• “Avval smena oching.” Smena yopilgan. Yangi smenani oching.
• Yuqorida “Smena” tugmasi yo‘q. Smena hali ochilmagan yoki sizda huquq yo‘q.
• Yopishda katta farq chiqdi. Pulni qayta sanang. Kassadan olingan pul yoki xarajat yozilmagan bo‘lishi mumkin — ega yoki menejerga ayting. Smena hisobotidagi “to‘lanmagan” buyurtmalarni ham tekshiring: ular hali pul olinmagan buyurtmalar.
• Noto‘g‘ri summa kiritib yopib qo‘ydim. Yopilgan smenani kassada o‘zgartirib bo‘lmaydi. Ega yoki menejerga ayting — farq hisobotda ko‘rinadi, sababini ular biladi.
• Internet yo‘q paytda yopdim. “Internet yo‘q — smena yopilishi kassada saqlandi va keyin yuboriladi.” Hammasi joyida: internet qaytganda smena o‘zi yopiladi. To‘liq hisobot ham internet bo‘lganda ko‘rinadi.